ब्रेकिंग

क्रीडा

स्मृती मानधना ठरली सर्वाधिक शतके झळकाविणारी जगातील तिसरी फलंदाज

Samruddhi Dhayagude
12 May 2025

कोलंबो : भारतीय महिला संघाची स्टार सलामीवीर फलंदाज स्मृती मानधनाने आणखी एक शतक झळकावले आहे. भारतीय महिला संघ आणि श्रीलंका महिला संघात त्रिकोणीय मालिकेतील अंतिम सामना सुरू आहे. या सामन्यात स्मृती मानधनाने श्रीलंकेच्या गोलंदाजांचा चांगलाच समाचार घेतला. यादरम्यान शतक पूर्ण करताच तिच्या नावे मोठ्या रेकॉर्डची नोंद झाली आहे.

स्मृती मानधना ही वनडे क्रिकेटमध्ये भारतीय महिला संघासाठी सर्वाधिक शतके झळकावणारी फलंदाज आहे. आता तिच्या नावे आणखी एका मोठ्या रेकॉर्डची नोंद झाली आहे. स्मृती मानधना ही महिला वनडे क्रिकेटमध्ये सर्वाधिक शतकं झळकावणारी जगातील तिसरी फलंदाज ठरली आहे.या खेळीदरम्यान तिने श्रीलंकेच्या गोलंदाजांना सळो की पळो करून सोडले तिने चौकार आणि षटकारांचा पाऊस पाडत आपलं शतक पूर्ण केलं आणि हा रेकॉर्ड देखील आपल्या नावावर केला.

स्मृती मानधनाने या सामन्यात फलंदाजी करताना ९२ चेंडूत २ षटकार आणि १२ चौकारांच्या साहाय्याने आपलं शतक पूर्ण केलं. हे तिच्या वनडे कारकिर्दीतील ११ वे शतक ठरले आहे. ती वनडे क्रिकेटमध्ये ११ पेक्षा जास्त शतकं झळकावणारी जगातील तिसरीच महिला क्रिकेटपटू ठरली आहे. हे शतक पूर्ण करताच तिने इंग्लंडची स्टार फलंदाज टॉमी ब्यूमोंटला मागे सोडलं आहे. टॉमी ब्यूमोंटच्या नावे वनडे क्रिकेटमध्ये १० शतकं झळकावण्याची नोंद आहे.

या सामन्याबद्दल बोलायचं झालं, तर स्मृती मानधनाने प्रतिका रावलसोबत मिळून डावाची सुरूवात केली. भारतीय संघाला सुरूवातीलाच धक्का बसला. प्रतिका रावल ४९ चेंडूत ३० धावा करत माघारी परतली. त्यानंतर स्मृती मानधनाने हरलीन देवोलसोबत मिळून महत्वपूर्ण भागीदारी केली. हरलीनने ४७ धावा केल्या. तर कर्णधार हरमनप्रीत कौर ४१ धावा करत माघारी परतली. जेमिमा रॉड्रीग्जने देखील ४४ धावांचे योगदान दिले. शेवटी भारतीय संघाला ५० षटकअखेर ७ गडी बाद ३४२ धावांचा डोंगर उभारण्यात यश आलं. भारतीय संघाने गुणतालिकेत अव्वल स्थानी राहून फायनलमध्ये प्रवेश केला.भारताने मालिकेतील ४ पैकी ३ सामने जिंकले. आता फायनलमध्येही भारतीय संघ मजबूत स्थिती आहे.